Iss - bara 330 cm af 5000 kr seðlum

"Milljón" hélt ég bara að væri orðin úrelt hugtak í fréttaflutningi -  teldist nánast skiptimynt.

Milljarður væri tekinn við - helst með þúsund sem forskeyti.  Það hugtak virðast allir geta rætt af miklum eldmóði , en litlum - ef þá nokkrum - skilningi. 

Til þess að fá einhvern skiljanlegan mælikvarða á svona upphæðir breyti ég þeim í seðla.

Upphæðin sem danska fréttin fjallar um, væri "bara" 3,31meters þykkt búnt af nýjum, sléttum, íslenskum 5000kr seðlum. 

Samþykktar forgangskröfur í bú Landsbankans eru 30 kílómetra þykkt búnt af samskonar 5000 köllum.

Í fréttaflutningi af ársfundi Fjármálaeftirlitsins 26 nóv s.l.  kom fram að vegna hrunsins hafi tapast  þrettánþúsundogtvöhundruðmilljarðar íslenskra króna ( 13.200.000.000.000 kr ) það samsvarar búnti af 5000 kr seðlum (nýjum og sléttum) sem væri 316 km að þykkt.

Væri seðlabúntið lagt á hliðina, gæti það orðið samfelldur kantsteinn meðfram þjóðvegi #1 frá Rauðavatni við Reykjavík að Skaftafelli í Öræfum. 

JÁ - SÆLL  !!!  Ólafur Ragnar kvittar auðvitað bara undir nýtt lán og reddar okkur út úr þessu !

 

 

Skipti 140 milljóna króna ávísun

Athugasemdir

[Rúnar Þór Þórarinsson, 14.12.2009 kl. 04:25]

Skuldir bankanna gætu þá talist í maraþonum eða bara "Þonum"

• Landsbankinn:  0,7 Þon
• Kaupþing: 2,4 Þon kannski eða þar umbil
• Tap þjóðarbúsins væri þá bara bara 7.5 Þon
• ...og svo framvegis.

Miklu skiljanlegra með allt í smærri hlutföllum.

Þá væru þjóðir mældar í tíma pr. þon eftir því hversu fljótar þær væru að losa sig við skuldirnar. Svona gæti maður lesið í sögubók árið 2119: "Íslenska þjóðin hefur að meðaltali hlaupið eitt þon á 12 ára fresti síðustu 90 ár og er því brátt búin með upphitunina fyrir meginþolraunina sem fylgdi á 3. áratug síðustu aldar."

Svo virkar þetta ljómandi vel sem viðskeyti aftan við allskyns slagorð og svo er þetta líka jákvætt því það er hollt að hlaupa (mara)þon!

Hið besta mál.

[Þorkell Guðnason, 14.12.2009 kl. 09:52]

Takk fyrir að standa næturvaktina Rúnar Þór.   Mér gengur furðu vel að skilja stærðir sem ég get mælt með metrakerfinu.  Takk samt.

Þið Ólafur Ragnar rúllið þessum skuldamálum auðvitað upp.  Næturvaktin tekur þetta !